National Digital History шетелде тұратын қазақтар туралы деректі фильм түсірмек
«Қазконтент» АҚ National Digital History порталының шетелде тұратын этникалық қазақтар туралы «Қиырдағы қазақтар» атты 8 сериялы деректі фильмінің түсірілімі басталды. Деректі фильм 16 желтоқсан – ҚР Тәуелсіздік күні қарсаңында дайын болады. Бұл туралы ҚР ақпарат және коммуникациялар министрі Дәурен Абаев Орталық коммуникациялар қызметінде өткен баспасөз конференциясында хабарлады.
«Халқымыздың тағдыры тарихтың қиын-қыстау кезеңдерін қамтиды. ХХ ғасырдың бірінші жартысында болған қайғылы оқиғалар ата-бабаларымыздың алдына қиын таңдау қойды. Осы себептен бүгінгі күні Отанымыздан тыс жерлерде миллиондаған қазақтар тұрып жатыр. Алайда, арақашықтыққа қарамастан, олар бабаларынан қалған салт-дәстүрлер мен әдет-ғұрыптарды сақтай алды. Бүгін біз «Қиырдағы қазақтар» атты өте маңызды жобаның тұсауын кесіп отырмыз», – деді министр.
Дәурен Абаев айтып өткендей, министрлік және National Digital History порталы осы жобаны қоғамды, азаматтарымызды шетелдегі қазақтардың өмірімен, тұрмысымен және тағдырымен таныстыру мақсатында Ұлт жоспары аясында іске асырып отыр.
«Жоба ағартушылық сипатқа ие және Елбасымыз төрағасы болып табылатын Дүниежүзілік қазақтар қауымдастығының 25 жылдығына арналады. Сериал 8 бөлімнен тұрады, түсірілімдер 8 елде өтпек. Фильмді мемлекеттік тілде түсіріп, кейін оны орыс және ағылшын тілдеріне аударуды жоспарлап отырмыз. Көрермендер осы фильмді Тәуелсіздік күні қарсаңында көре алады деген үміттеміз», – деп атап өтті Д. Абаев.
«Қазконтент» АҚ төрағасы Евгений Кочетов түсірілімнің осы айда басталатыны туралы ақпараттандырды.
«Бүгін біз еліміз, халқымыз үшін аса маңызды жобаны бастағалы жатырмыз. Бұл ауқымды, өршіл, керемет әсер қалдыратын жоба болмақ. Фильм өздерінің тарихи Отанынан тыс жерлерде тұрып жатқан отандастарымыз жайында. Ресей, Түрікменстан, Өзбекстан, Тәжікстан, Қытай, Монғолия, Иран және Ауғанстандағы қазақтардың қалай тұрып жатқанын, олардың күнделікті өмірін көрермен назарына ұсынып, олардың тарихы, қайғысы, жетістіктері, ақсақалдардың естеліктері, күнделікті өмірі мен тұрмысы, жырақта құрметтеп, сақтап қалған дәстүрлері туралы айтып бермекпіз. Осы жолда біз алыс шет елдерде тұрып жатқан, бірақ рухы бізге жақын жүздеген адамдарды кездестіреміз», – деп атап өтті «Қазконтент» АҚ басшысы.
Бұл фильм ҚР Тәуелсіздік күні қарсаңында толық дайын болатынын айта кеткен жөн.
«Біздің әсерлі саяхатымыз шілде-қыркүйек аралығында өтеді. Осы фильмді 16 желтоқсанға дейін National Digital History порталында бағалай аласыздар. National Digital History жобасының жетекшісі Олжас Беркінбаевқа өз зерттеулерінде жаңа белестер ашуға деген өшпес ниеті үшін жеке алғыс айтқым келеді. Біздің алдағы барлық іс-әрекеттеріміз бен кездесулеріміз жайында әлеуметтік желілерде «Қиырдағы қазақтар» хэштегімен тұрақты түрде хабарлап отырамыз», – деп қорытындылады Евгений Кочетов.
